خير اللهم اجعله خير

[size=18]

خير اللهم اجعله خير

شوفتك لابس أبيض × أبيض

زي ملاك

زي ما كنت أنا باتمناك

جيت بتقولي :

إن فاضل لي .. معاك أيام

هيّ كده كل الأحلام

مش هتفصّل حلم مقاسك

تحلم بيه أول ما تنام

رديت قلت : أكيد بتهزر

أصل أنا عارفك غاوي هزار

قلت كابوس .. و صحيت م الخضة

خير اللهم اجعله خير

بس غريبة

شوفتك بردو بنفس الصورة

لابس أبيض

أبيض × أبيض

تحت البيت زينة بتتعلق

و أنا واقف مش قادر أصدق

يمكن لسه أنا باحلم بردو

ولا الحلم كده بيتحقق

و أما بدأت أتأكد فعلاً

م اللي أنا شايفه

قلت أباركلك

قُمت مقرب منك أكتر

و أنت بتضحك

يعني زماني بجد ما كنتش

هاعرف حاجة

لولا الحلم بتاعك فضحك

ممكن قبل اما أمشي أقولك

كلمة فــ سرك

أنا غيرت حياتي عشانك

بس لقيتك مش بتقدّر

واحد غيرك لو في مكانك

أبسط حاجة .. كان يتأثر

أو كان حتي يبان فــ عينيه

إني حقيقي صعبت عليه

و إنه هيزعل

إن الحلم

اللي عشانه حلمت أنا بيه

خير اللهم أجعله خير

لا هيتحقق ولا يتفسر